新民主同盟譚凱邦（Roy）最近有幸登上左報《文匯報》頭版兼且冇被批鬥，之不過身份就由荃灣區議員變成運輸署職員，查實呢兩個職業都唔係阿Roy自小嘅「我的志願」，相信大家估唔到，佢曾經諗過做記者。

1980年出生嘅阿Roy，最突出嘅形像係環保鬥士，原來環保啟蒙源於一位老師。就讀中華傳道會安柱中學嘅佢話，中四嗰年生物科老師對環保議題好上心，帶同學出海睇中華白海豚，「好記得當時係下午近黃昏，都睇到成8至10條，我哋當時嘅環保教育概念，只係停留喺海洋公園之嘛，呢次真係感受到大自然嘅奧妙，有啲環保種籽散播咗。」

中四對佢嚟講都幾重要，佢形容呢年之前講嘢唔多係乖乖仔，主要掛住讀書，校內成績唔錯，「都係靠死咪爛咪」；當年有人選佢做班長，開始培養領袖風範，揀大學時順理成章按興趣，入咗中大讀環境科學，佢話針對環保議題，中學時流於諗點樣做，大學就係實踐期，包括加入「綠色天地」環保學會做內務副會長，同時又去過紐西蘭交流考察環保，尤其係垃圾分類，「幾百人報名得嗰十幾個位，真係爭崩頭。」

佢自爆當年有三個志願，除咗做教師及環保工作，就係做記者，前兩樣都實現咗，佢曾任教於順德聯誼總會梁銶琚中學，張秀賢都係佢學生，成立嘅「環保觸覺」，明顯為達成夢想。點解及後從政，08年參選立法會九龍西選舉？阿Roy話當時發現環保問題都涉政治，「要走入個制度，先可以更大力推動」，又指如「盲搶地」嘅不善政策，源頭與單程證審批有關，所以都要推動民主嘅社會。佢仲話好慶幸自己成家人都支持民主，「成日都一齊鬧民建聯」。