廣船(317)今年全年表現標青,1月仲喺1.50元樓下橫行,眨吓眼升咗5倍,如坐飛船。雖然升咗咁多,但仍無損散戶入市興致,隻股噚日收8.93元,升3仙。
喺《Yahoo討論區》內,網友winnie高呼:「廣船好!我買咗,決定長期持有。之前賺過幾轉啦。」金錢龜對此不以為然:「工行(1398)一出,萬股皆瀉,還有兩天偷雞時……一字記之,『貴』貨必輸……1.X→7.X貴貴貴貴貴貴。」
對於金錢龜的「忠告」,winnie未太在意:「買少少應該唔怕啩,A股嗰邊升到15蚊啦。」
廣船主業係建造及銷售船舶;提供修理船隻服務;同埋製造及銷售鋼結構及機電設備。集團今年8月中公布中期業績,純利大升1.4倍。受惠於新船需求增加,加上人工成本偏低,有利取得海外定單,集團預測第3季純利將急漲5倍。展望未來,喺8月完成擴充船廠後,產能將會增加,係另一個利好因素。