爆棚哥系內股票呢轉大落後，搵隻有前景嘅股票買，買保華集團（498）。保華呢期主打港口及內房業，喺個場裏面，港口股PB全部1倍過外。保華最新NAV0.9元，現價0.37元折讓58.8%，係所有港口股當中，折讓最大嘅股分。又以呢個折讓同多隻內房股比較，保華吸引力亦即時彈出嚟。
保華兩瓣業務已經成形，相信踏入2010年度（3月底止），可以提供更大嘅增長動力，保華嘅折讓，有機會同同類股拉近。再講，喺保華嘅土儲裏面，仲有1.5平方公里係以成本價入賬。係咁意計數，以每方呎增值50蚊計，講緊增值已經高達8億銀，土儲中線價值一釋放，條數又唔係咁計。呢轉博保華PB上番0.6倍，見0.54元，保華要升46%，未有耐追到同業。

丹楓受惠豪宅升值

丹楓控股（271）喺0.60元打橫行咗4個月，冷灶係時候。丹楓最新NAV1.80元，現價0.59元折讓67%，已經有唔錯嘅折讓墊底。又丹楓透過聯營揸咗唔少紅山半島豪宅物業，呢期豪宅成交價一支箭向上飆，呢批物業肯定有唔錯增值水位。保守重估，每股增值0.20元，丹楓折讓上到70%。博丹楓反映番每股增值0.20元，價見0.79元，現價潛在回報率34%。

錢雋