【新增動新聞】
民建聯立法會議員蔣麗芸今朝一早就喺立法會走廊，攞住兩幅助理提供嘅相，好激動地向記者發言，話現時反對一地兩檢嘅民主黨同公民黨，上周先搞咗大陸高鐵團，宜家又反對一地兩檢，明顯係「口是心非」，又話「民協就最多㗎（高鐵團）嘞，不過宜家民協無人喺度（立法會）。」

元秋話助理影到呢啲相，係因為民建聯都搞唔少高鐵團，咁啱撞到白鴿黨同公民黨啲團。元秋其後又手持手機，笑住讀出唔同網民留言，話一地兩檢會影響世界和平、人類安全、導致地球滅亡、宇宙毀滅、影響人類探索火星計劃，就連今日下晝掛三號風球，都同一地兩檢有關喎。

元秋激動後就好似好後悔咁話：「我又發火嘞，我話咗唔發火㗎，又係你哋叫我唔好發火，跟住勞氣喎」，透露連自己個妹都勸佢唔好發火，「佢話我一發火鬧人，個樣唔靚㗎！」

對於元秋嘅指控，白鴿黨尹兆堅反駁完全無邏輯，指對方連民主派究竟反對乜都搞唔清楚，指出民主派現時反對嘅係喺香港西九站進行一地兩檢，認為應改喺內地福田站進行，並唔係反對高鐵呢種交通工具。