台灣天王周杰倫（周董）下年1月喺紅館開騷，6場「地表最強世界巡迴演唱會」門票上個禮拜二開售，20分鐘就賣晒，轉頭就見網上有炒飛，最貴嘅1,080元炒高12倍變12,880元，認真誇張。買唔到飛嘅粉絲仲有機會，周董噚日喺尖沙嘴舉行記者會，宣佈加開1月15至17號3場，佢講笑話要開夠20場先滿足到粉絲需要：「見歌迷留言買不到票，我跟老闆說不如開20場，這是我的夢想。」
講到啲飛炒到過萬蚊，周董話壓力好大：「真的不知道學生買票壓力很大，我現在壓力也很大，要唱得更好。」之前有網友貼出「絕望座位表」，投訴公售嘅飛唔夠五分一，其餘被內部扣起，問今次加場會唔會撥多啲出去賣，周董冇正面回答：「這次開9場，希望下次可突破數字，我也問過主辦方可否開20場。」

撞正結婚周年

下年1月18日係周董38歲生日，17日尾場又係佢同老婆昆凌結婚周年。佢笑話可以順便慶祝，開騷時老婆同囡囡都會嚟睇騷：「到時我唱歌，她們逛街。」囡囡已經過咗1歲，周董坦言想追個仔：「計劃是明年，可以生男生，做一個好字，我喜歡熱鬧，可以有足球隊或是樂隊。」
撰文：馮仁昭