一手樓盤炒風盛，摸貨多到數都數唔晒，熱賣嘅西灣河嘉亨灣，最近重有宗摸上摸成交㖭，賺得重多過第一手摸出。
呢個五座中層G單位，面積六百七十四呎，七月尾以二百八十八萬九千元一手購入，唔夠一月就以三百一十五萬摸出，執到二十六萬一千蚊。點知接手嗰個炒家，今個月成功以三百五十八萬再摸出，兩個零月賺四十三萬，幅度重大過之前一手。單位累積升幅達兩成四。
除咗嘉亨灣外，蘭西記得有摸上摸嘅一手盤，包括薄扶林貝沙灣，同荃灣朗逸峯。

國泰88兩個鐘賣清
拆細商場出售潮近期再現，繼大鴻輝拆售的葵涌廣場「時尚坊」火速賣清舖位後，另一個位於灣仔嘅「國泰88」商場，噚日搞內購，兩粒鐘賣晒一百六十六個舖，估唔到連外籍客都入市。
代理美聯工商舖行政總裁黃子華話，唔少投資者買入超過一個舖位，最多一個買咗十幾間，動用資金二千幾萬。而一個由住宅部帶嚟嘅外籍客，就用二百萬買咗兩個舖，計劃收租。
灣仔道一二五號「國泰88」商場，地下至三樓共一萬七千呎，舖位面積六十五至二百幾呎，售價四十五萬至三百七十五萬。

銅鑼灣舖租全球第三貴
高緯物業報告表示，銅鑼灣舖位租金，喺全球最貴租值排名榜位列季軍，同舊年一樣，而喺亞洲就排第一，每呎月租三百七十蚊。第一位就係冧莊嘅美國紐約第五街，呎租六百一十八蚊；亞軍係法國巴黎，每呎月租四百六十二蚊。
高緯話銅鑼灣係人流量極高嘅區域，加上港人消費信心恢復，同埋自由行帶動，令租金從沙士低潮急速反彈，升幅係全亞洲之冠，幅度達五十四巴仙。
呢個報告係由全球五十四個國家、二百二十九個購物區收集租金數據得出嚟嘅。