兩大鈴聲王鬥到飛起
手機入歌仔都興咗好耐，但講到編寫鈴聲的佼佼者就不得不提杜B同天行者！前者自創鈴聲轉換器每月坐定定收兩千銀註冊費，後者泊到微軟香港同eolasia.com兩個大碼頭月入過四萬。訪問期間兩位互相鬥氣，各有各精采。
記者：宋國榮
攝影：陳穎
杜BProfile
真名：LeoTo
藝名：杜B
幾大：19歲
做緊乜：現讀Year1、鈴聲網頁「Ringtone之城」揸Fit人、曾為《壹本便利》等多份雜誌提供手機鈴聲簡譜。
幾時入行：1999年尾
月入：約兩千
入行共賺：八千
共編鈴聲：約1,000首
杜B網頁收Fans
為《便利》供稿
「當時買了一部可以入歌仔的電話ERICSSON768，發覺原來自己入歌仔都幾好玩，跟住開始在互聯網新聞組內Post自己作品畀人參考。其實教人入歌仔完全為興趣，根本冇諗過可以賺到錢。後來《壹本便利》首先搵我供歌仔稿，誤打誤撞下就入咗呢行，重早過天行者。」
版權貴好難做
「因為版權問題，好多雜誌報章都開始有所避忌，出版教人入歌仔的歌書市場唔再係咁大，而且將來歌仔會轉型為網絡商Download並非自己鍵入，收入會相對減少，靠呢行搵食絕對唔穩定。除非可以搵到大公司同你合作，如果真係好想入行的話，都要有賺唔到錢嘅心理準備，你估個個都好似天行者咁好彩咩！」
我唔做益咗人
「點睇天行者泊到大碼頭？其實微軟香港同eolasia.com的『Ringtone王』都係搵我幫佢哋寫歌先，不過當時時間唔容許，亦唔想迫得自己咁辛苦才拒絕。況且寫鈴聲前景唔係咁好，費事影響到自己讀書前途。如果自己做的Nok2Phone軟件出名的話一樣咁開心，反正做入歌仔都係為興趣，唔會好似人哋咁博出位！」
天行者Profile
真名：TonyLui
藝名：天行者、手機太郎
幾大：30歲出頭
做緊乜：同eolasia.com的「Ringtone王」合作《人氣Ringtone王》及《偶像Rinetone王》兩本歌書揸Fit人、微軟(www.msn.com.hk)鈴聲網頁掌舵人、供歌仔稿畀某大本地網絡商、編寫某手機牌子的內置音樂等。
幾時入行：2000年10月尾
月入：過四萬
入行共賺：過70萬
共編鈴聲：約1,000首
天行者泊大碼頭收入高
半年賺二十萬
「當初自己試入8210的歌仔覺得鈴聲好特別，睇準入歌仔將會成為熱潮，於是觸發出書念頭，之後開始出了幾本鈴聲書如《鈴聲王》、《歌仔靚》等，估唔到潛力咁大，半年內就賺了差不多二十萬，於是辭去本身GraphicDesigner的工作全力做鈴聲書，算係一次賭博。」
月支版權費三萬
「版權費對於出鈴聲書有冇影響？當然有！起碼𠵱家每月支出約三萬畀版權費，不過相信鈴聲書還有發展空間，例如『Ringtone王』網頁就發展得好快。而且𠵱家流行的單和弦將來會轉成多和弦，鈴聲其實等於音樂，發展路向會變，個個人都需要，冇咁快玩完。只要搞好宣傳同認真去做，有信心鈴聲書一樣有得做。」
我有實力叻過人
「當然泊到『Ringtone王』呢個大碼頭梗係好，但最緊要別人認同自己的實力。好似幾間現在的合作夥伴都唔係第一個搵佢，就算某些雜誌如《壹本便利》都係由第二個轉畀我做，咁就證明自己編的鈴聲好過人！將來希望有大公司注資搞鈴聲書，淨係畀我負責鈴聲部分，咁我就瞓晒身去做鈴聲喇！」
採訪手記
咁細的手機鈴聲市場分餅仔，同行如敵國無可避免。訪問途中記者都聞到唔少火藥味，兩位受訪者似乎都在暗寸對方，有人話唔得閒太辛苦所以接唔晒啲Job，有人就話自己寫歌寫得好所以大客棄用舊人專登上門幫襯。孰是孰非，記者難作判斷，不過兩位都係本港鈴聲界的中流砥柱，不如一團和氣，繼續同我哋編多啲最新最快的鈴聲重實際啦！