Well！被人影到撐台腳，一齊去美國拍外景又玩曖昧，歐洲就被安排速遞送花，搞咁大壇大龍鳳原來係煙幕。

噚晚黃美棋出席將軍澳中心舉行嘅足球活動，被人問佢有冇同男友鍾健威拍拖睇波？佢竟然話：「佢唔係我男友，係朋友，大家多數都係各有各睇，我自己本身唔係追住睇，係6月頭去歐洲做嘢，喺當地睇過幾場。」

講開歐洲，佢口中的朋友鍾健威將自己人肉速遞兼同送花探病，場面溫馨，仲以為佢兩個已經合體，美棋BB解釋話：「唔係，有線見我病病哋，搵佢隨時頂替我。」唉！突然降呢做朋友，咁會唔會請朋友上屋企一齊睇波？佢斬釘截鐵話：「唔會咁隨便俾男仔上來。」

至於鄭俊弘否認一腳搭幾船，但係冇講搭緊邊隻船，相信應該唔係姜麗文呢一隻，因為姜麗文講到明要專注事業，姜麗文喺噚晚個活動表示，嚟緊會簽新唱片公司，佢話：「0依家好忙，要keep住作曲。」維穩歌會唔會作先？佢話：「不嬲唔會講政治，多數講愛情。」咁又係0依家應該感受好深，容易到位！



【7.1上街】自己政府自己揀，直播7.1大遊行:
http://71.appledaily.com/