I am back，新馬季亦告展開，現今世代已沒所謂的唞暑，7月中至9月初，只相隔個半月，對上季尾一批跑開馬，等如小休再跑，相對缺陣時間較長馬，明顯較具優勢。

我知、你知，練馬師當然唔會唔知，復工後，發現數個馬房，均顯然以上述一類馬，部署為季初先頭部隊。

開鑼日（2日）第二場五班1600米，「葵涌老友」、「有衝勁」、「日東昇」、「乘勝追擊」、「五陵霸」、「人間尋夢」及「大運舞台」，繼上季煞科日（7月15日）又再同場，改跑1600米，還各有不同的負磅減幅。

「有衝勁」乃李易達上季尾部署的追數馬，收埋操好等煞科，慘被一場雨打沉，細馬負重磅跑濕重場地，令其無法交出預期水準。

今季落在方仔手上，食住上季做好勢頭，一早復課，8月尾先做草地拍跳，再試大閘，知道夠皮後，刻意安排唔跳留力，做法明智。

縱使或會再遇濕地，但由上季132磅，到這次只負118磅，如釋重負條件大不同，促使我會博「有衝勁」變身！

「大運舞台」同樣由重磅變輕磅，競爭力大增，至今跑淋地全負，確要臨場視乎場地再定。

然而賽前所做工夫，擺明要打快攻，轉一套以往從未用過操法，刻意唔試大閘，安排兩課草地拍跳，操到火紅火綠，重戴眼罩跑強項，有運抽2檔，可跟可放會好好跑，除非持續有雨，否則一定要拖。

再數，「乘勝追擊」及「五陵霸」，均屬上季尾好開馬，前駒1600米稍短，但排一檔會幫好多；後駒今季不覺再進，但勝在年青、有狀態、有潘頓，抽四檔亦好，縱唔想此熱門入到Q，也預作保險腳。

第八場三班1400米，唔似爆冷格，博過關揀此場，先要「威進駒」，上季尾久休復出都跑得好，自此健康回穩，呂健威食住個勢繼續逼，埋門大圈拍跳、大閘、草地，課期全做齊，不揀第九場1200米，揀1400米，明智！

最強對手是暑後轉壯的「芙蓉莊」，潘頓早在8月中擸上手，操練編排恰到好處，可博進步。

「飛星凱旋」此程能贏「酷比仔」及「龍船」，有黃俊減十磅，兼排最重要內檔，跑出水準有爭Q本錢。

「一舖成名」上季走有利場地僅勝四班，升三班面臨考驗，只比同場其餘馬稍好。

文：子健