中軟國際（8216）6年嚟，純利飆升咗9倍，嚟緊日子，繼續肥仔水，要昅實。中軟呢家IT企業，01年度（12月底止）以嚟，純利年年增長，而07年度純利上扣1億銀（人仔．下同），相對01年度翻咗五個番！睇往績，已經有保證。
中軟主打客戶之一，包括好似審計署、煙草專賣局呢類祖國大型單位。啱啱喺月頭，集團又同中國藥監局簽署咗合作備忘，進行技術平台發展。祖國金融業火速發展，睇嚟集團冀望未來5年嘅收入，上扣5億美金（係07年度嘅4倍），再闖另一個高峯，唔係難事。
又中軟啱啱公佈08年度第一季業績，實際純利增長貼近40%，全年度純利增長，只係keep住呢個幅度，中軟純利都講緊1.5億銀，平均PE落到8倍單位數。買中軟，擺中線，博翻一番到2.9元，預期PE都係講緊17倍。以高增長股計，呢個PE都仲係好平。

勤達好嘢唔怕收集

勤達（1172）07年度（12月底止）業績見紅，加埋伸手供股，但好嘢唔怕收。勤達新發展廣東墓園業，以墓園晒士，及上年9月嘅數據參考，單係攞中位數，估計勤達實佔收入已經高達60億銀。最新資料係，呢期墓地平均租價又再調升30%，墓園收入又可以再冚多10億、8億銀上去。又只當純利率25%，純利18億銀，攤分10年入賬，連供股攤薄效應，勤達每年PE兩倍唔夠。
勤達再跌收集，擺埋一邊，博佢翻一兩番先收手。