日本樂壇天后安室奈美惠嘅兩場深圳演唱會今晚開鑼，不少歌迷一早到場排隊搶購限量商品，由於深圳係安室嘅告別騷唯一中國站，所以吸引中國各地歌迷支持，仲有大量專程越洋捧場嘅日本歌迷，亦有女歌迷cosplay安室嘅空姐造型。

中國粉絲亦準備多個花牌放在場館內，場內前排每個座位都放有一枝黃色玫瑰花，望到時台下歌迷舉起玫瑰令安室有個美好回憶。體育館用2/5面積做舞台。

2155：演唱會完結。告別演唱會唱足兩個半鐘，最後安室答謝：「多謝大家今日來到睇我Live。」

2151：最後一《How do you feel now?》是小室最後一次為她作的新歌，舞台回顧安室25年來片段，同時大放花炮。

2141：全場樂迷等encore，拍住手大叫Namie，安室再上台同《海賊王》crossover，換衫唱最後一次為《海賊王》主題曲《Hope》。

2136：唱到尾聲《Do It For Love》，舞台升起展示「25 THANK YOU I LOVE FAN!」的巨型字牌。

2111：安室不停換look，換上白色裙只係唱咗一首歌，隨即再換上吊帶白色小背心短裙，唱兩首經典快歌《Body Feels EXIT》及《Chase the Chance》。不過唱《Body Feels EXIT》表現不穩定兼甩嘴，又不時用手撳耳機。唱《Chase the Chance》時則好落力，重演當年在台上跑來跑去，又rap又唱，無欺場。

2102：唱完兩首小室作品《Don't wanna cry》、《NEVER END》後，換上全白公主look唱代表作《CAN YOU CELEBRATE?》

2045：唱《a walk in the park 》時，兩旁大螢幕分別播出安室2012年演出及她於90年代的片段。

2033：唱到第17首由小室哲哉負責曲詞編嘅《You're my sunshine》，安室落力勁舞，但由於呢首歌勁高音，安室似唔多夠氣。

2024：唱完小室時代《SWEET 19 BLUES》後，安室換黃色裙唱一連串經典快歌，以《TRY ME》打頭陣，配合射燈全場勁high。

2012：安室勁歌熱舞唱完《Say the word》，再唱出大熱情歌《Love Story》，觀眾以亮起手機燈搖晃。

1958：換上珠片one piece裙，唱出《Showtime》及上年單曲《Just You and I》及《Break It》。

1948：第七首唱《NEW LOOK》，然後唱《WHAT A FEELING》，唱《WHAT A FEELING》安室企喺台上嘅大廈模型上，配合燈光以刺激眼球。

1939：換上粉紅色裙唱《Baby Don’t Cry》，呢套衫之前喺名古屋站已經現過，並向Fans擺心心甫士。之後再唱出《GIRL TALK》。

1932：唱出今晚第四首歌《Mint》。

1922：第二首唱《Hide & Seek》，到尾聲時閃電換上另一打扮，跟住唱《Do Me More》，造型性感。

1916：安室着紅色衫，打頭陣唱出《Hero》，此曲亦是安室最後一次上《紅白》選唱。

1914：演唱會開始，全場尖叫。屏幕上先回顧安室出道至今不同變化。