禮多人不怪，趙飛雲喺新嘅一年祝各位讀者身體健康，炒股得心應手。
美股2001年最後一個交易日全面報跌，杜指跌115點，收10021，但只較2000年收市價10787跌766點，跌幅僅7.1%。納指跌36點，跌幅1.85%，收1950，較2000年收市價2470，跌21%。標普500指數跌1.1%，收1148，較2000年收市價1320，跌13%，趙飛雲寫咁多美股數字，唔係為咗填格仔，而係想話畀讀者聽，美國經濟進入衰退，但股市尚未充分反映，目前美股嘅水平已經係炒緊復甦概念，如果美國經濟未能達到市場預期，喺今年第2季開始復甦，不但美股有難，港股亦有難。

中石化繼續持有
趙飛雲開倉初期曾講過，炒股最重時機，牛市時人人係專家，愈夠膽愈贏得多，到大市展開調整時，散戶可以造淡嘅工具唔多，入市非常蝕底，勉強逆勢揀股票買，輸多贏少，不如靜心等候時機才出擊。美股除夕咁跌法，港股今日順勢調整居多，所以暫時唔介紹股票，至於倉內嘅中石化（386）好多時不但不受恒指下跌影響，有時重成為資金避難所，可繼續持有。