當年今日

與歐倩怡同是順德人
燊悅家傳珠鏈鄉下攞威

蘋果日報 2002/03/30 00:00


記者朱芷瑩順德直擊
張燊悅(Nicola)、歐倩怡(Cindy)、許志安同漢洋,早幾日去咗順德出席「順德建市十周年大型文藝晚會」之「群星璀璨耀新城」嘅活動,Nicola同Cindy原來都係同鄉「順德人」,大家重係第一次返鄉下㖭,所以佢哋話心情好緊張。

四萬人捧場
今次個節目喺順德嘅新城市政府廣場舉行,入場觀眾有成四萬人,所以現場唔只有幾百位公安維持秩序,協辦單位重派多咗五十位保安喺場內駐守㖭。
Nicola話第一次返鄉下唔衰得,重專誠戴咗條家傳之寶嘅長珠鏈上台,佢話:「呢條珠鏈係阿婆畀我媽咪,媽咪再畀我嘅,我當正佢係寶,咪帶返鄉下威吓囉。」
而Cindy就着咗件透視裝襯lowcut上陣,見佢比以前肥咗,佢話:「呢排都係休息吖嘛,我諗過兩個月,自己嘅前途去向就會明朗㗎啦。」

周迅與張曼玉搞同性戀
內地著名演員周迅噚日出席亞視外購劇《橘子紅了》記招,周迅對於導演戴思杰有意開拍一部女同性戀嘅電影,佢同張曼玉將飾演一對女同性戀者,佢話:「這件事確實有人找過我,電影名還未有,劇本我都有看過,一切都還未落實,所以目前不是很方便透露。」而張曼玉日前喺上海出席某商品代言人時,佢就親口證實將會接拍這部女同性戀為題嘅電影,佢重話對演女同性戀角色好有興趣。
郭富城義賣二手衫
郭富城近日唔止捐咗一批衫畀王賢誌,喺下個星期四舉行嘅東華三院二手衫熱賣活動中義賣,佢重答應喺下個星期二,同沈殿霞一齊幫呢個活動做宣傳。而馮仁昭同王賢誌傾開偈時,佢好鬼勞氣咁話有周刊指佢將黎明啲二手衫價錢訂得太貴,佢話其實係周刊自己搞錯晒啲價錢。

陳司翰出碟家姐畀錢聽
陳司翰噚日喺港台接受港台《娛樂滿天星》訪問,講到自己隻新碟,佢話反應唔錯,第一批已經賣得七七八八,公司重即刻印緊第二批,問佢有冇送碟畀家姐陳慧琳同女朋友,佢就話:「六十幾蚊隻碟,差唔多十蚊一首歌,梗係要自己買啦!最多買咗之後幫佢哋簽名。」

周杰倫越洋食檸檬
周杰倫俾美國嘅樂壇小天后BritneySpears請食檸檬,拒絕周杰倫翻唱佢嘅歌。Britney一直係百事可樂嘅代言人,佢主唱嗰首廣告歌好受歡迎,台灣嘅百事公司本來諗住將佢首歌畀台灣代言人周杰倫翻唱,但Britney經理人就話首歌係為Britney度身訂做,唔啱周杰倫咁話。

柯受良乖仔拒與F4比
柯受良二十一歲嘅仔柯有倫入咗娛樂圈已有一段日子,噚日佢專登喺台灣飛嚟香港,為台灣電視劇《極速青春》做宣傳。佢話:「我拍呢套劇五月就會喺台灣播,自己唔係靚仔,冇打算同F4比較,遲啲會主力唱片工作,老竇好支持我。」