陳法拉、歐鎧淳同湛琪清等，今日喺尖沙嘴出席「Weekend Max Mara x 保護動物慈善協會」活動，愛貓之人法拉就話佢養嘅貓已經10歲，諗起貓嘅壽命比人類短，都唔敢諗將來要面對生離死別，佢仲話o依家去到邊都會帶埋愛貓，佢話：「佢係搭飛機常客，好似我3年前去美國讀書，我都會帶埋佢。」

過埋8月法拉就會返美國開學，完成戲劇碩士課程，原來佢最近自編自導自演緊一部短片，佢話：「前日諗住開始拍，點知落大雨，真係萬事起頭難，今次會喺香港同紐約拍，仲拍咗好多膊頭，會搵大家識嘅人演出，佢哋都係義演，要好好享受同學習製作過程。」法拉仲話今次係小本製作，只會預5位數字成本。至於搵邊個主演？會唔會係之前教過佢嘅奇雲史帕西（Kevin Spacey）？法拉就賣關子話：「可能，最好啦！」咁男友會唔會客串一角？法拉就即刻話：「唔好嘞，佢做返自己嘢，佢唔鍾意上鏡。」

另外，歐鎧淳宣佈書展會出書，會唔會係出泳衣相集？開估啦！大家諗太多嘞，佢話：「未必有泳衣，今次係生活化，唔多相嘅，講自己嘅運動生涯，本書農曆年寫到5月，寫咗5萬字。」咁有冇感情故事？鎧淳就話：「有少少，因為我覺得人與人嘅關係好重要，所以寫咗一part。」鎧淳透露本書叫《鎧分享》，但就唔敢期望銷量，怕冇人會買。而佢最近仲為卡通片《天使愛芭蕾》配音，因為以前跳過芭蕾，今次能夠為以芭蕾舞作主題嘅卡通配音，算係圓咗夢。