今晚《今晚打喪屍》就喺灣仔一間酒樓舉行煞科宴，一班演員萬梓良、吳家麗、 張繼聰、白只、顏卓靈、J.Arie一齊現身。

其中主角之一嘅張繼聰，被問到老婆謝安琪早前被影到肚凸凸，係咪有喜？張繼聰就話：「其實好多報紙同雜誌都好關心我哋，有好多街坊同記者朋友都有恭喜我，而我暫時都冇咩可以公佈住。」咁係咪唔講得先？佢話：「唔講得就唔講得啦，收到大家嘅關懷都好開心。」咁Kay係咪有肚腩？張繼聰就笑言：「我做老公唔會見到呢樣嘢，我老婆咁正。佢係放咗幾個月假，食咗好多好嘢啫！」係咪暗示keep得唔好先？佢就話：「作為結咗婚嘅女性唔需要咁著重外型啦！」咁係咪有計劃要多個小朋友？佢話：「係呀！我哋都好鍾意小朋友，如果有咗一定會同大家公佈。」

而白只同顏卓靈一齊接受訪問，問到佢哋會唔會合作完唔想再情侶檔？顏卓靈就話：「唔知仲有冇機會，不過就唔介意再合作。」咁今次合作有冇激烈討論？白只就話：「冇喎！喺學術上嘅討論就有囉！冇啲激烈嘅劇情去討論。」有冇增進感情？佢話：「唔關部戲事，平時都有增進感情。」咁又有冇計過拍咗幾耐拖？白只諗咗一輪就話：「拍咗好耐啦！」問到係咪拍緊拖嗰陣，戲組搵你哋合作？佢哋就話：「其實戲組唔知我哋拍緊拖嘅，應該冇人知！」