當年今日
關於我們

行家戥帝王碧比唔抵

蘋果日報 2005/02/15 08:00


今日由於打早場的關係(比賽時間係當地下午三時半),所以午餐都乾脆喺場館入面解決:有牛扒、腸仔、沙律、麵包同朱古力蛋糕任食的傳媒餐,盛惠不過八蚊美金(唔使稅),加上飲品任飲,可算大件夾抵食。

法蘭西斯落選合理
早前出咗明星賽後備名單之後,好多人都為無一名球員入選的帝王抱不平,估唔到呢邊都係一樣。喺食飯嘅時候,同一班克利夫蘭的行家講起明星賽,佢哋都覺得帝王的碧比落選最唔抵。因為以球隊戰績嚟計,帝王唔差過超音速,但後者就有阿倫同路易斯兩個入選;假如畀番一個位帝王,咁樣感覺上就公平好多。
之後再講到今年的滄海遺珠,坐我隔籬、幫hoopshype.com寫嘢的DavidFriedman就話,最唔明係點解咁多人都覺得法蘭西斯應該入選。佢話假如呢位魔術控球後衞冇咁獨食,好似尼殊或者傑特的話,一早已經成為東岸第一,最後David更話法蘭西斯只不過好紐約人嘅馬貝利少少。其實,睇波係好個人嘅主觀感覺,球員表現好壞,有時真係見仁見智;不過有樣野想講嘅係:千祈唔好自誇「第一控衞」,否則只會好似馬貝利咁自取其辱!