身陷財困，要勞動政府注資拯救嘅全英最大按揭機構HBOS又爆醜聞，繼上個月豪花400萬港銀大搞派對，慷納稅人之慨惹嚟猛烈批評後，仍然未識死。噚日彭博報道，HBOS犒賞100名表現最佳嘅分行經理，帶埋配偶飛去紐約四日三夜旅行嘆世界。

上個禮拜五，HBOS舉行股東大會，主席史蒂文森先至話，公司仍然經營困難，今年壞賬撥備增加至50億英鎊（約580億港銀），至於萊斯銀行嘅收購方案，亦獲股東投票通過。
公司財困，高層好應該開源節流，為公司慳荷包，點知事隔一日，HBOS又傳出花大筆錢請員工同家屬去紐約旅行，兼包埋旅程使費。HBOS發言人接受訪問時仲話，呢個獎勵員工計劃有咗差唔多十年，至於要使幾錢，佢就冇講。
今次HBOS獎勵員工旅行，可以話係AIG翻版。兩個多月前，同樣獲花旗政府注資打救嘅AIG，俾傳媒踢爆，花費三百幾萬去加州度假酒店搞超豪會議，結果俾白宮同國會議員強烈抨擊。
不過HBOS冇吸取教訓，雖然話呢個員工獎勵計劃早喺舊年已經獲批，但既然公司財政唔掂，就算取消獎勵，員工都會體恤啩，唔通大家攬住一齊死咩？

金融海嘯衝擊下，HBOS陷入財困，搞到要問政府注資115億英鎊（約1333億港銀）拯救，仲俾萊斯銀行收購埋，股價由年初至今暴挫超過九成，公司高層仍然唔識諗，亂咁花費，買咗佢哋股票嘅小股東就認真悲哀。

李華華
mailto:[email protected]