呢幾年，大台鬧小生荒，高層自然要力捧新力軍填補空位，憑住爆肌露肉嘅王浩信，係其中之一。一直做開二線尾三線頭嘅佢，喺今年劇集《樓奴》同《EU超時任務》，就擔正做男一。

前年王浩信(Vincent)自動波同大台加簽5年新約。為咗Keep住副搵食body，加上近排對踩單車突然有興趣，日前王浩信同老婆陳自瑤(YoYo)就孖住去北角一間單車舖揀單車。

當日所見，一身運動衫加黑超型仔look嘅王浩信，入到舖頭就同sales詢問單車型號，揀啱幾款Road bike後，就即場試踩，記者睇價錢，每架大約2、3萬左右。至於一直喺身邊陪住老公嘅YoYo，雖然間中有俾吓意見，但就顯得有啲心不在焉！

當王浩信試車之際，YoYo發現有記者喺門外、即大方同記者揮手say hi，記者趁機問佢係咪陪老公嚟揀車，點知YoYo一開口就話：「佢(王浩信)話要喺屋企踩返工，踩返去TVB，唔揸車喎！」YoYo歎咗一聲繼續講：「屋企去TVB其實唔係好遠，但都擔心佢嘅安全，一嚟環保大道好大塵好污糟，二嚟又多大車，佢踩出馬路……驚啲大車司機見佢唔到……驚佢出事，陣間有機會，你哋(記者)幫吓手，勸吓佢啦！」

而王浩信喺舖頭揀咗大約 45分鐘，見有警察喺門口趕車，未揀到心頭好，就雞咁腳同老婆揸車走人。

早喺今年2月，王浩信拍新劇《致命復活》嗰陣，飛車時冇用替身搞到爆缸入院，當時已經嚇到YoYo個心離一離。(新聞連結： http://bit.ly/2fcqjio )
呢頭冇事，嗰頭又「身痕」話要喺公路踩車，女細老婆嫩，「信號王」，大個仔啦，咪搞到老婆咁擔心先得o架！