【add名人時尚】生意跌9成和員工一齊捱 LeSportsac老闆娘：50年來最嚴峻一次
蘋果日報 2020/03/21 02:00
addLeSportsac虞茱迪add名人時尚
武漢肺炎重創全球經濟，香港各行各業都進入難捱歲月，酒店餐飲、零售業等首當其衝。
LeSportsac手袋、法國生活品Pylones等的代理虞茱迪(Judy)，昨日在人流不多的金鐘太古廣場巡舖，她透露疫情爆發之後，生意額插水式喪跌九成，「而家差不多得番10%，比平時跌咗九成，利害過沙士！沙士時時間短啲，當時跌咗七成。𠵱家遊客區店舖少咗好多生意，我哋都試過有舖頭係全日冇開單，一單生意都冇。」
Judy早年將Lanvin、Nina Ricci引入香港，經營SWANK時裝店等，她指現時疫情衝擊是半世紀以來最強勁，「我做零售做咗五十年，實在未見過，今次真係好犀利，真係好艱難。𠵱家已經好入肉，個個月蝕好多錢。」品牌旗下有6間分店，大業主仍未減租，但她堅持和員工一齊捱，希望捱到市況復蘇，「我哋啲員工已經行緊輪班制，公司亦縮短辦公時間，節省開支，糧當然照出啦，佢哋個個都知公司𠵱家好難，但難關大家一齊過，只要堅持，堅持先有希望，希望同事都緊守崗位，積極面對。」
她謂現時最重要人人保持身體健康，有健康才可以堅持，計劃下半年再搞括動，「最近好多學生返嚟，有部分仲四圍去，希望大家有責任心，不論家長、學生都做得好啲，一齊去面對件事，等疫情快啲過去。」
採訪:林妙萍
LeSportsac手袋代理虞茱迪(Judy)透露生意大跌九成 ，比沙士跌七成更嚴重。
她希望和員工一齊堅持，捱到市況復蘇。
疫情下，太古廣場人流稀疏。