當年今日
關於我們

【又要大家幫下手】中文譯名譯一半? 《Captain Marvel》首輪預告釋出

蘋果日報 2018/09/18 22:30

預告marvelCaptain MarvelBrie Larson貝兒娜森

Marvel電影唔經唔覺已經稱霸影壇十年,由第一部《鐵甲奇俠》(Iron Man)開始,到最近嘅《復仇者聯盟3:無限之戰》,唔少觀眾由一開始對美漫零認識變到依家嘅死忠fans,超級英雄電影嘅吸引力真係唔講得笑。
今日Marvel嚟緊嘅力作《Captain Marvel》終於釋出第一個正式預告,由於故事背景喺九十年代,所以大家可以喺預告當中見到後生版嘅神盾局局長Nick Fury仲未變單眼。
而預告一開始可以見到由金像影后貝兒娜森(Brie Larson)飾演嘅主角Carol Danvers由外太空跌咗落一間Blockbuster當中,順帶一提Blockbuster係一間喺九十年代於美國發展得非常大嘅電影電視出租公司,當年嘅對手Netflix被完美碾壓,猶如早幾年大台同亞視一樣,不過時至今日,Netflix成功轉型締造出網上串流王國,而Blockbuster喺美國只剩低幾間由私人擁有嘅分店。
首輪預告暫時見到嘅故事線非常少,只可以從中得知Carol屬於一個外太空組織,因意外跌落地球後被神盾局局長搵到,而Carol仲話一直以來都有零星片段喺佢腦中閃過,表示佢似乎喺地球生活過,而其他片段非常分散,例如無端端郁手打阿婆,雖然幾好笑,但係就令人費解。
預告當中仲出現《銀河守護隊》第一集當中嘅反派羅南(Ronan)同埋佢嘅克里星人手下,預告最尾可以見到Carol嘅制服由綠色轉為漫畫當中嘅紅藍配色,而能力方面喺預告當中只可以見到佢手同眼發光,被fans認定為《復仇者4》打敗反派Thanos(魁隆)關鍵嘅Captain Marvel能力有幾強暫時都仲係一個謎。
不過,仲有一樣嘢係fans非常關心嘅,就係戲名喇,畢竟一部戲嘅戲名其實都好影響部戲嘅收視,而繼《雷神3:神域末日》及《蟻俠2:螞蜂俠崛起》被網民批評而要改名成《雷神3:諸神黃昏》及《蟻俠2:黃蜂女現身》之後,今次嘅戲名《Marvel隊長》又再一次被網民批評,有人話好似譯咗一半放棄咁,又有人話不如就咁叫《Captain Marvel》算啦。
其實今次《Captain Marvel》要改譯名真係唔係咁易,事關以漫畫譯名改嘅話,好大機會會變成《驚奇隊長》或者《漫威隊長》,兩者望落其實都真係唔係幾討好,之但係要點改呢就真係要大家發揮下創意幫下手喇。
精選娛聞,喺晒《娛果》
http://fb.com/appledailyent
empty
Blockbuster(百事達)係一間喺九十年代於美國發展得非常大嘅電影電視出租公司。(網上圖片)
empty
Captain Marvel喺能力方面喺預告當中只可以見到佢手同眼發光(網上圖片)
empty
預告暫時見到嘅故事線非常少(網上圖片)
empty
只可以從中得知Carol屬於一個外太空組織(網上圖片)
empty
Carol仲話一直以來都有零星片段喺佢腦中閃過,表示佢似乎喺地球生活過(網上圖片)
empty
其他片段非常分散,例如無端端郁手打阿婆(網上圖片)
empty
《銀河守護隊》第一集當中嘅反派羅南(Ronan)都會出現(網上圖片)
empty
《復仇者3》片尾嘅call機(網上圖片)
empty
年輕版phil coulson探員(網上圖片)
empty
年輕版神盾局局長,仲有兩隻眼(網上圖片)