出爐應屆港姐冠軍雷莊𠒇，噚日俾《蘋果》讀者透過「爆相爆片」捕獲佢單拖現身尖沙嘴，相中嘅Juliette雙目無神兼有啲疲態(新聞連結： http://bit.ly/2gJB7aa )，結果有唔少網民睇完之後，對佢嘅「真我的風采」有唔同嘅意見！

今日Juliette同亞軍何依婷、季軍黃瑋琦到佐敦領獎，Juliette被問到呢件事，佢大方承認相中人係佢兼話：「我自己睇到呢段新聞呀，個樣真係好差呀，我自己好鍾意去食大排檔，嗰陣周圍望搵餐廳，唔知有鏡頭對住！」佢仲話：「當選港姐之後，難啲唔俾人認得，可能因我個人比香港女仔高啲，所以易啲俾人認到！」

唔知下次會唔會打扮吓先出街？Juliette笑笑口話：「唔會喇，我覺得如果要放好多心機自己匿埋打扮，好煩同嘥時間，而且我本身鍾意causal打扮，而且天氣又咁熱，所以都係鍾意着短裙同短褲。」至於有冇同父母慶祝拎獎？佢話：「未呀，佢哋啱啱返咗加拿大，慢慢喇，或者等我有時間返加拿大，同埋男友一齊慶祝。」