土共、老左對陳太參選睇唔順眼，噚日終於由人大常委曾憲梓發出重炮狂轟，八方同好多人一樣，未必同意曾人大言論，但左派陣營應該好興奮，事關有人秉承已故「徐大炮」遺志，毫不吝嗇火氣，出盡全力挺葉劉，橫掃一切牛鬼蛇神，對阿爺唔like嘅人，打擊絕不手軟。

曾人大噚日喺一個「孔子文化展」活動上，被記者問到對陳太參選有咩睇法時自動撻着，「我對陳太呢，我都唔知點樣去評價。」雖然口講唔識評價，不過曾人大之後狂數陳太，十足十文革時寫大字報咁款，差在未打砸燒啫，「佢當年身為政務司司長，竟然同董生不和，要辭職唔做，放棄咗同中央溝通，你本來有溝通平台，但你放棄，幾年後又忽然民主，參加遊行。」
曾人大又要陳太自我檢查交代，深挖思想根源，「我咁尊重嘅陳太，點解會變成咁㗎？」至於係咪坦白從寬、抗拒從嚴，點樣先算過關，曾人大未有明言。當年文革破四舊，好多人狠批孔老二，曾人大選擇喺「孔子文化展」開批鬥陳太大會，相信係有備而來，唔係無的放矢隨口噏。佢話對陳太參選感到莫名其妙，「從一個愛國愛港人士，變成一個公開同中央對抗嘅反對派人士，我為佢可憐，我為佢可惜。」
曾人大批鬥陳太一發不可收拾，越講越激動，更扣帽子批判陳太「三宗罪」。佢話陳太當年做到政務司司長，如果繼續維護《基本法》、愛國、愛港，本來好有條件做特首，不過佢放棄咗呢個機會，斷送坐上特首寶座機會。曾人大呢番說話，講到陳太好似唔維護《基本法》、唔愛國、唔愛港咁，不過好似老董咁，咪又係落得腳痛下台呢個下場！

陳太參選時話，希望做港人同中央溝通橋樑，曾人大身為國家領導人級人物，話中央會同理念相同嘅人溝通，至於佢支持邊個，唔使佢講大家都知，「今時今日嚟睇，我會支持葉太。」曾人大家住九龍，支持葉劉都冇得投票，所以佢表明會幫手拉票，鼓勵有投票權嘅人支持葉劉。
曾人大唔係港島人都咁落力幫葉劉拉票，八方助佢一臂之力，呼籲所有支持曾人大嘅港島區選民，認同曾人大言論嘅選民，一於聽佢話，投票畀葉劉；至於支持陳太嘅人，相信都會識做，唔使八方講嘞啩！