「都冇合適對象，咁點結婚呢？唔通夾硬喺街搵個結婚咩？」貴為「新股女王」的鍾絳虹，縱橫金融界廿多年，不時與銀行家、律師打交道；交際圈子再闊，也沒有人可以打動她的心，感情路上，仍然一片空白。對此，她坦言早已放下那一顆恨嫁的心，「依家我有冇盤都冇所謂啦，有就最好，冇我唔覺得係問題。」

不少女人，都將「29+1」之齡，視為人生的分水嶺。有人會選擇在這段時間結婚嫁人，相夫教子；但鍾絳虹卻將那段女人的黃金時間，貢獻予工作，「有一段時間，阿媽都會問，『點解都唔見你結婚，都冇帶人返嚟』。每一位女性，都有最恨嫁嗰幾年，但嗰幾年我好忙好忙，忙到冇時間諗呢個問題。」的確，鍾絳虹金融圈人面廣，但對事業的專注，令她與銀行家、律師的交流，只限於工作層面，「每一次大家都為工事好chur，你唔會向另一方面諗。」

講到性格，她形容自己古肅，感情方面反應特別遲鈍，變相令她成「愛情絕緣體」，「你知唔知綾瀨遙以前有套日劇，叫咩乾物女呀，依家諗番，我就係嗰啲人，第一代嘅乾物女。」所謂「乾物女」，源自日本女星綾瀨遙主演的日劇《螢之光》，講述女主角的單身生活，她雖並非完全無意戀愛，只是覺得麻煩。鍾絳虹笑言，自己天生就有乾物女的DNA。

感情事從來不能強求，但回想當日選擇與金融市場談戀愛，「我係冇後悔過嘅，工作被人認同，其實都係開心事囉。我唔係唔結婚，係冇合適出現。」到底何謂合適？今日的她又有甚麼擇偶條件？「我從來都冇要求㗎。有時啲人話你搵一個啱嘅人呢，你自己唔知邊個係你啱嘅。所以啲人成日話有冇咩要求，我覺得呢啲全部都係嘥氣，就算係適合嘅人，都要有適合嘅時間。」事實上，她的戀愛觀，比不少人都更清醒。

investMAN
For People of Style & Substance
掌握理財智慧 感受生活品味
http://facebook.com/investMAN.hk