iPhone4供不應求，吸引師奶都炒埋一份。炒家Kelvin去年炒機賺咗10萬蚊，一直炒到家，就算早幾日收機價跌，放機僅有50至100蚊利潤，Kelvin一樣照入貨。不過佢都驚蝕，所以早有準備，秘訣就係利用信用卡限額制度，因此唔怕大跌市，有咁盡賺咁盡。
Kelvin教路：「譬如我訂20部，張單總數係99,760元，但我張卡入面仲欠萬幾蚊卡數，10萬蚊信用額一定爆，如果我要完成交易，只要入返錢去信用卡戶口，再打去Apple，張單至可以翻生，如果唔入錢，張單就唔會生效，咁樣個主動權就喺你手上，唔使好似其他人咁，一落單Apple就出貨。」
好多人跟風炒iPhone4埋怨信用卡限額太低，嫌入得貨少，Kelvin反而諗到利用信用卡限額走盞，大跌市都可全身而退，唔到你唔服。佢話自己從來唔會等價，最緊要走得快，博走多幾轉，利潤已經翻兩番。