西班牙《馬卡報》周一舉行年度頒獎典禮，攞咗上季西甲最佳球員嘅巴塞隆拿前鋒美斯，因做腎石手術而缺席，焦點就落喺拎上季西甲神射手嘅皇家馬德里前鋒基斯坦奴朗拿度身上。
皇馬喺呢個頒獎典禮威到爆，除咗C朗攞神射手之外，佢隊友沙治奧拉莫斯就當選上季最出色嘅西班牙國腳；至於安察洛堤雖則喺上年夏天俾皇馬炒咗，但照樣贏最佳教練。雖然近期有指剛剛滿31歲嘅C朗，會返曼聯或者轉投巴黎聖日耳門，不過佢就重申會喺皇馬留到約滿為止，向現任教練施丹大派定心丸。C朗話：「我同皇馬份合約去到2018年先至屆滿，我會一直留喺度。」

至於啱啱出咗手機遊戲Apps嘅美斯因為做腎石手術，所以嚟唔到，巴塞話呢位28歲阿根廷國腳可望喺周三復操，但就應該唔會派佢踢周三訪華倫西亞場西盃四強次回合。另外，曾效力巴塞嘅瑞典球星軒歷拿臣日前返咗去探班，除咗同恩尼斯達等舊隊友合照之外，仲大讚教練安歷基令巴塞越嚟越勁㖭。