當年今日
關於我們

  哀 伊拉克愛國遊擊隊綁錯自己友 - 李八方

蘋果日報 2004/04/13 00:00


伊拉克愛國恐怖分子發起癲上嚟,連鄔維庸曾憲梓都自認不如,伊拉克反美愛國同胞組織,唔理三七二十一,失驚無神捉咗七名中國福建民工做人質,搞到全世界得啖笑!

指鹿為馬 傷透同胞心
拉登九一一恐怖襲擊之後,中國政府縱容中國網民及大學生拍手歡呼,幸災樂禍,大讚拉登炸得好,本港有啲所謂知識分子傳媒,包括某假扮為香港電子傳媒嘅電視台,僱用一批唐人街式三流文人評論員,大讚拉登,瘋狂挺撐侯賽因,歡呼伊拉克人民「起義」,鼓動拉登及伊拉克佬用「人民戰爭」埋葬「美帝」。嘿,估唔到今次伊拉克人民及拉登餘孽,一招狗咬狗骨,連自己老友死黨都綁架埋,真係大大傷害了中國人民感情!
呢七個福建農民,進入伊拉克,睇吓行走嘅路線,十足好似啲「埃埃」偷渡嚟香港咁嘅風格,迂迴曲折,翻山過河,蛇有蛇路,鼠有鼠徑,由另類渠道進入巴格達,佢哋唔似得同樣被綁嗰三個日本人士目的咁規矩。人哋三名㗎仔,係志願工作者,入伊拉克救援兒童難民,或者係自由攝影記者,冒着炮火見證歷史,係國際熱血義氣仔女。呢班福建人只不過係為搵快錢,掘少少金就諗住衣錦還鄉,好似百幾年前紮住條辮去到美國西部開鐵路嘅華工咁。伊拉克嘅愛國暴力恐怖維園阿伯,不分青紅皂白,尤其經過四名英國專家,以中立姿態,驗明正身,都重係將佢哋一鑊紮起,準備就地正法,其指鹿為馬嘅功力,重高過中國共產黨,你話有乜法子唔傷透我十三億中國同胞嘅心?
因此,連八方呢啲咁風趣幽默嘅時事評論家,焗住都睇唔過眼,要以萬分沉重嘅心情,向半島電視台、侯賽因餘孽及拉登游擊隊嚴正呼籲:綁錯自己友,今次懵晒上心口,唔該你哋請示吓先知穆罕默德,叫佢釋吓法,評吓理,睇吓咁做唔,枉我祖國人民
恐怖分子 睇得起祖國
不過在愛國情緒平息之後,八方諗諗,今次都未必唔係好事。啲伊拉克游擊隊連祖國非法勞工都綁架,其實係睇得起祖國。正所謂有錢使得鬼推磨,啲恐怖分子,愛乜鬼國吖,咪又係好似啲港區商家人大代表咁,都係想搵錢啫,近年大陸同香港遊客,去倫敦巴黎,瘋狂掃名牌貨,喺紐約多倫多機場過境,講電話嗌咪,一路將啲名牌一箱箱咁寄艙,其財大氣粗全球側目,今次伊拉克佬覺得我國人民有贖參嘅財力,同美英日本呢啲發達國家拍住同一級,人綁我又綁,都咪話冇飛屎吖。又唔見佢綁幾個菲傭嚟玩吓,係哇?


傳真︰2623-9278
電郵︰[email protected]