雷神莫雷拉早前專擒潘頓，不過佢始終係人唔係神，呢期潘頓打到雷神落花流水，令莫雷拉季內在港每次出賽長勝神話破滅，終於斷纜了。
潘頓上月初國際賽日起孖後，氣勢急劇轉弱，近一個月居然三次捧蛋，熱門輸到馬迷嗌救命，潘頓死火同一時段內，雷神卻要風得風，包括上月11日谷草夜馬四喜臨門，而且三番四次氣走潘頓座騎。被雷神不停剃眼眉，潘頓今期報復贏四Ｗ，「寶德」及「齊飛」先後氣走雷神座騎「辣得喜」及「偉寶之星」勝出，搞到雷神在往後場次越跑越沉，個人自去年10月20日出任公司騎師以來，破天荒單日全軍覆沒。