當年今日
關於我們
【李八方online】水上人婚禮搞足3日 香港婚嫁囍事回顧展
蘋果日報 2018/03/01 18:52
明日(3月2日)就係元宵佳節,apm舉辦「香港婚嫁囍事回顧展」,展出多款50年代至70年代本港水鄉婚嫁珍品,包括蜑家人嘅嫁妝同喜帳,呈現昔日漁民係水上棚屋穿梭迎娶新娘嘅嫁娶文化。原來以前香港嘅水鄉婚禮,歷時3日3夜,男家親戚會坐係掛有大紅燈籠嘅舊式木舢舨,載住36盒聘禮,沿住水道浩浩蕩蕩咁搖到棚屋迎娶新娘。
展覽仲有香港開埠至今嘅黑白及彩色菲林結婚照、逾50年歷史嘅圓型禮餅擔盒、1970年代漁民獨有嘅婚嫁茶坐及器皿、以及舊式磁石日曆及拍婚照必備嘅海鷗牌古董相機等。新鴻基地產(中國)執行董事馮秀炎話,之前農曆新年長假及情人節,商場整體人流錄得約430萬,整體營業額約1.8億元,人流及營業額均較去年升約15%至20%,預計元宵節連同周末及周日,apm商場三日人流可達100萬,較去年升約15%。
香港婚嫁囍事回顧展
馮秀炎話,預計元宵節連同周末及周日,三日人流可達100萬。
展覽展出以往蜑家人的嫁妝及喜帳。