日本品牌洗頭水TSUBAKI，一向都動用大批當紅女星去拍廣告，包括小嶋陽菜、水原希子、蒼井優、竹內結子等等，但今日舉行咗嘅發表會中，除咗有女星渡邊杏、鈴木京香同埋三吉彩花出席之外，仲宣佈加入一個天王級人馬賣新廣告，就係福山雅治。

福山係第一個加入TSUBAKI廣告嘅男星，佢今日雖然冇出現喺發表會中，但係都有錄片段，佢話平時都會留意女性嘅頭髮，亦會留意女士們頭髮嘅香氣。喺廣告入面，福山會為三個女士選擇合適嘅洗頭水，仲會做埋洗頭仔，幫三位女子洗頭，真係恨死好多福山粉絲。