立法會政制事務委員會今日開會，除咗傾選舉事務處遺失電腦一事，另一個議題係研究下屆立法會選舉嘅選票設計，係咪可以刪除候選人相片或者黨徽等。

點解要研究改選票設計？皆因近年參選名單水蛇春咁長，以上屆新東為例，有成22張名單，而呢款選票設計最多放到24張名單咋，但一眾立法會議員似乎唔多buy，咁又係，關乎以後張選票有冇自己個嘜頭，梗係緊張啲。

民建聯劉國勳就舉例話，如果工聯會個何啟明同民協何啟明一齊去直選，冇咗張相同黨徽，分分鐘搞錯仲影響選情；工聯會麥美娟之後加把口，話呢件事真係好困擾佢嘅黨友、即係現任勞工界議員何啟明，因為試過何著住工聯會件衫影相，傳媒刊登時都當咗民協何啟明噃。

講完撞名，民建聯蔣麗芸就講吓撞樣，話黨友劉國勳同民主黨尹兆堅都係「圓碌碌」，有啲似樣，亦有女性候選人可能會P圖，所以選票應該保留足夠資訊畀選民投票時考慮，似乎呢個刪相兼刪黨徽建議，未必過到關喎！