經過多次賣地，市場開始接受了高價成交結果，表現十分冷靜。當然，幅幅地都話創新高價，橫掂豪宅對一般大眾距離越來越遠，倒不如計清自己口袋有幾多銀両，等曾特首出甚麼招數，捕捉新一次機會好過。
聽地產代理話，細價樓成交急停，涉及兩個死因。第一，銀行快做買家壓力測試，供樓「掹掹緊」的買家基本上暫時無謂諗，根本無銀行會借錢。另一原因是價錢半年間升了太多，業主無意減價，買家又諗住樓市會調整，無理由現在入市做儍仔，以致買賣兩閒，特別是一直以用家為主的市場，成交量比7月份跌足五成。

多落區睇樓掌握市況

樓仔不同豪宅，豪宅主要為有錢人的玩物、收藏品，如碰上心頭好，不惜一擲萬金，買回來後自己欣賞。樓仔卻有自用需要，一買錯，首期凍過水，故此碰上樓市調整，轉趨審慎反而是理性做法，好過跟風做大鱷點心，後悔也來不及。
無論閣下是買樓自用抑或投資收租，揀物業必須找一些流通率穩定和有出租能力的屋苑，因為轉身較快，不受大市升跌影響心情。要做到處變不驚，選擇防守性強的屋苑，起碼碰上靜市時瞓得着，毋用擔心筆首期化為烏有。
老樓認為，細價樓將到調整時候，投資者如何口硬，見勢色不對亦會減磅出貨，把損失減至最少，何況樓價已升了一定合理水平，只不過減少賺幅，蝕入肉機會不高。用家若有充足的資金，亦宜再等一會，待消息較明朗化後才入市，減輕風險。最重要是留意大市走勢，可落區睇樓，將更易把握最佳入市機會。

劉兆昌
http://www.HKLau.com