聽日就係薛凱琪(Fiona)生日,身為佢好友嘅鄭融,舊年就畀壽星女驚喜,專登訂咗紥好靚嘅玫瑰花,點知Fiona見到紥花就話冇訂到花,叫對方核對清楚,最後要鄭融好尷尬咁出聲話冇送錯,真係佢送。
鄭融今日去到港台參與《好孩子星期天》活動,重提舊事佢都覺得好好笑,可惜聽日要拍MV拍足全日,所以陪唔到Fiona慶祝,惟有後補禮物。
本身極愛小朋友嘅佢,每逢參與小朋友活動都好興奮,佢話:「有啲人覺得小朋友好嘈好煩,不過我就好鍾意活潑小朋友,可能我本身仲好有童真同無厘頭。」將來佢想生一仔一女,若果可以龍鳳胎就最好,可惜佢同男友家族都冇生過孖胎。