【唔敢返大陸】盧惠光不想被隔離 未答應返橫店拍戲
蘋果日報 2020/06/11 18:02
橫店盧惠光
攝影：盧妹
盧惠光今日到新城接受訪問，透露將為古天樂與英皇合作的十部抗疫電影開工，他說：「我就做錢嘉樂嗰套，過兩日開工不過未有劇本，叫咗佢唔好要我打，郁下好啦，早兩日舊患復發條腰痛到差啲落唔到床。」他表示為幫助電影人，未有問酬勞多少：「叫得你，願意做就做，唔會問，如果畀封利是我會收，唔畀亦唔會問。」提到早前演藝人協會的抗疫基金，盧惠光表示不需要申請，更捐出五位數予基金。
至於其他工作，盧惠光直言不敢到大陸開工：「有電影同網絡大電影搵我，喺橫店，不過去到又要坐14日，返嚟又要坐14日，但係開工就開得4、5日，而家仲諗緊。」
提到兩個兒子盧俊諺及盧俊希，他指細仔昨日已復課：「大仔早兩個幾月喺英國返咗嚟，未有咁快返去。嗰時梗係擔心啦，啲外國人見到黃種人戴口罩就講粗口鬧，追住佢半條街鬧，仲要行到好埋，我個仔咪推開佢囉，大佬，而家又唔係得罪你哋。」
盧惠光直言不敢返大陸。
盧惠光將參與演出抗疫電影。