在馬場見到地盤總監惡佬明與幾個判頭,惡佬明又幾好運喎,中齊六環彩與三寶,之不過,第五場14號「英才」來遲一步,輸咗俾9號「點解」,只得第二,咁就中唔到六寶獎,派彩只有178元、三寶更只有43元,惡佬明每注中五蚊,收錢真係得啖笑,不過都好過左丁山,因嫌賠率太低,刻意扒冷,結果斗零都冇得收。
原來惡佬明等人亦有留意亞視欠薪事件,主因係勞工處好似怕咗工聯會之建造業職工總會,成日派人抽查建築界之大判二判有冇欠薪,是否如期出糧,搞到惡佬明火滾,有一次直情對勞工處官員講:「亞視欠薪有冇咁緊張呀?」一位判頭亦在馬場同左丁山呻:「張建宗明顯大細超,對亞視欠薪理都唔敢理,但對我地建築界就幾惡死。」張建宗、蘇錦樑係玩大細超吖,咁又點啫,梁老闆冇「責成」佢地好好監管亞視吖嘛!
凡係商界事情受到政治干擾,就完全超出常理,變幻莫測,亞視處於不生不死狀態,不知捱到何時,過氣局長王永平在專欄話最好俾「亞視安樂死」,都幾幽默。經常往返上海北京之公子A就話:「鬧劇還會玩落去,最長可能玩到秋涼時份,十九大召開之後。現在全國反貪腐,風聲日緊,毫無放鬆跡象,我啲上海朋友話習大大開始部署十九大後人事,預料到時好多前朝重要人物因貪腐已被迫離開政壇,騰出好多空缺,由習大大重新安排過。再之後咯喎,睇吓邊啲人士真係理會亞視啦!」亞視唔駛去到咁高層次呀?左丁山有啲懷疑,不過較早前有傳媒報導亞視背後嘅背後與令計劃幾熟,則又好難講得清楚。
張總話外灘有一間開張一個月嘅高檔意大利菜館,主廚來自威尼斯名店,享譽甚高,但上海外灘店生不逢時,碰啱打貪腐風潮,高官富豪要避鋒頭,不敢光顧,該店平時收開一千元人民幣一餐,但張總竟在網上發覺有團購,以十分一價錢可到該店光顧一餐,於是與夫人前往一試,發覺水準甚高,難怪全場爆滿。但張總擔心長此以往,此店必定虧大本離場,故此對公子L講:「下次去,一定要試吓,遲則蘇州過後無艇搭。」以十分一價錢點可以長期維持高水準?公子L話內地嘅酒店食肆,現在係愈高檔愈難做,不少投資金錢會付諸流水。