周汶錡(Kathy)、陳小韻、楊張新悅、Rosemary、Amanda S.今晚齊到中環出席時裝活動，Kathy以Deep v真空上陣襯西裝到場，佢話自己都鍾意中性有型嘅打扮，問到囝囝有冇讚佢？佢就話：「都有㗎，尤其我搽紅色唇膏，就會停低唔做其他嘢。望實我，要我抱抱都埋錫佢。佢(囝囝)仲會學我咁化妝，識得夾眼睫毛，仲會用粉撲撲吓塊面，不過唇膏我就唔會俾佢學嘅！因為唇膏就係女仔用嘅。跟住佢(囝囝)就會話I'm a girl，俾佢笑死我，仲話要學媽咪。」提到大仔已經26個月，問Kathy大仔會唔會對佢打扮有意見？佢話：「換衫一定會閂門，唔係俾佢發現就會搞搞震，同埋佢o依家成日唔俾我出去，會扭計唔俾我出門口。」

樂基兒最近再婚，Kathy就話一定要恭喜佢，如果佢想生BB一定可以俾到意見佢㖭！至於翁為德嘅老公鄒兆龍疑出軌一事，Kathy就話：「最近唔得閒睇啲八卦嘢，因為湊仔好攰，細仔又有病，但都識翁為德，之前生大仔時，咁啱佢嚟咗香港，都有見面，因為佢o依家住喺美國，又有三個小朋友，媽咪真係唔易做，相信感情生活唔需要我哋擔心，佢哋自己會處理。」問到佢點樣維繫夫妻間嘅感情？Kathy話：「有時都要誘惑吓個老公嘅！」