中國首富呢個位唔係咁易坐，坐得到又未必坐得暖。因為坐到呢個位自然引人注目，包括內地政府部門，好容易被人翻舊「賬」，跟手被拉埋落嚟㖭；二來內地人口多，喺經濟增長強勁嘅年代，出產首富比率都高過人。
長江後浪推前浪，玖龍紙業董事長張茵，舊年將間公司上市，冇幾耐就榮登首富寶座，點知坐咗一年左右，呢個首富稱號就讓咗畀另一名女子，仲係一名後生女──只得25歲嘅楊惠妍。
楊惠妍係乜水？一提碧桂園，大家就心照啦，佢係碧桂園老闆楊國強嗰二女。碧桂園上市超額認購200幾倍，凍結資金超過3000億。咁受歡迎，楊女都要多得同為順德人嘅UncleFour李兆基，多得佢開晒口話睇好碧桂園，仲有Uncle鄭裕彤力撐。
碧桂園上個禮拜五掛牌，曾經升到7.35元，最後收7.27元。碧桂園市值1163億元，唔單只係香港上市最大嘅內地地產股，市值仲大過UncleFour嘅恒基地產，彤叔嘅新世界。
揸住碧桂園59.5%嘅楊惠妍，賬面身家急升至692億元。上周五玖紙收16.46元，持股72%嘅張茵，賬面身家差唔多500億，同身家直迫700億嘅楊女差一大截。

讚自己勝在專注

張茵上星期出席博鰲亞洲論壇2007年會時被記者包圍，問佢失落咗阿一寶座點睇。張茵似乎對呢個位唔多志在，好輕鬆咁話，係咪首富都唔係咁重要。反而喺今次嘅年會上，有另一樣嘢令佢更興奮。
皆因佢今次出席年會，可以見到國際級首富蓋茨真人，就好似粉絲見偶像咁，話感到非常高興，又話蓋茨係佢嘅榜樣。跟住仲補番句讚吓自己，話佢之所以成功，最重要係夠專注。
不過，唔係人人都唔志在呢個首富位。內地傳媒引述重慶市委常委、常務副市長黃奇帆上個禮拜，同花旗銀行中國首席執行官施瑞德見面話，重慶市龍湖地產今年內可望喺香港上市。如果成功，中國首富嘅寶座可能再次易主。
李華華
[email protected]