【Little Englander】一小時的無憂安全感（孫柏文）
蘋果日報 2020/03/12 15:00
孫柏文武漢肺炎
孫柏文：香港喺呢廿年嘅沉淪，仲有邊個知咁多咩「特區」
孫柏文落筆呢刻，身在美國新奧爾良。繼12月喺香港，1月初去過新加坡，1月尾則到過米蘭後，而家都仲趁全球未同時封關前，去睇吓各地情況。
不過唔同之前，武肺真係開始影響旅遊質素。
多唔好講，今次喺希斯路一上機，我即刻用啲消毒紙巾勁抹張飛機櫈。雖然冇戴口罩，不過就將天花個空調吹嘴開到最大，對住自己面吹。始終飛機嘅空氣過濾系統，係用到醫院手術室級，而每十幾分鐘就將所有空氣過濾一次，所以希望可以盡量降低吸入病毒嘅機會。或吸入都好，數量不足以致病。
搭咗8個鐘後，到亞特蘭大落機，由飛機閘口行到移民局，都係冇黃皮黑眼人。大家唔好racist，覺得咁樣好安全。原因係去到我到嗰日，佐治亞州已有好幾宗確診，全都因去過意大利玩。
點知喺移民局，我攞我本有美國簽證嘅特區護照出來時。個着住避彈衣嘅移民局職員，問完我留幾耐（幾日）、來做乜（玩）等之後，唔肯落chop。將我本護照擺喺個綑黃邊嘅無色透明膠袋，call咗個同事帶我走。
我嗰刻即諗，搞咩呀？我有冇做過啲咩搞到美帝唔肯畀我入境呢？唔通因為我成日鬧聯儲局？因為我成日撐侵侵，搞到個deep state郁我？
咁嗰個職員，帶到我去一間睇唔到裏面嘅等候室外，叫我入去等等。就喺佢開門前一刻，我開始驚。因為喺呢啲等候室，如果有人有武肺，咁我咪舐嘢？
一開門，裏面坐咗大約十個睇落係拉丁美州人。聽佢哋講嘢同睇佢哋手持嘅護照，有危地馬拉、洪都拉斯等國嘅國民。黃皮黑眼人，得我一個。黑、白人，則一個都冇。
見咁嘅情況，我突然鬆咗一口氣。因我相信，全美國最冇武肺嘅地方，就係嗰間房裡面。雖然都仲緊張諗緊唔畀入境會點對付我呢個非美籍alien，不過因武肺緊張咗成個月嘅我，喺嗰刻對人身安全嘅安全感，真係難以形容。
等呀等，等呀等，一等就等咗成個鐘。嗰一小時就係好relaxing。
點知，等咗一個鐘後，間房嘅門突然打開，行咗對黃皮膚男女入來！睇落係阿叔同大媽咁嘅年紀。我嘅腎上腺素亦即時飆升！
個男嘅，揸住本藍色護照，係咁同個職員理論。話要趕搭接駁機，可唔可以快啲。點知個職員話：「你係唔需要入來，你可以隨時走。不過（指住個大媽）佢就要等。」咁個男人都無辦法咁同個女嘅坐低，而遞咗本綠色護照畀個大媽。
嗰刻，我覺悟咗樣嘢，不過又同時有另一疑惑。疑惑係點解佢哋個個都keep到本護照？我又唔得。而諗明咗點解我要坐喺間房。應該係同武肺有關。
香港喺呢廿年嘅沉淪，仲有邊個知咁多咩「特區」呀。個移民局職員，着得避彈衣，應該都唔係做開文職，見到我本護照大大隻字話「中華人民共和國」，一定當我係武漢經倫敦咁鼠入美國。而嗰個大媽，應該都係韓國人，所以同一理由被阻入境。
再過多幾分鐘，有個移民局職員喺門口嗌我個名。我行去到門口，跟住佢指示咁踏出房幾步企喺度，佢揸住我本護照問：「你最後一次去中國係幾時？」嗰刻，我黃絲思潮即湧現，答：「差不多超過一年了。」
佢點點頭，遞本護照畀我，祝我旅途愉快。我接過護照後，亦轉身向行李帶進發。一路行，一路同自己講：「信光復香港、時代革命得救啊！」