中原東涌分行嘅梁善球，攞到03年最多單數獎，一年促成一百一十三宗成交，平均三日就做成一宗，但都係細價樓嚟。
佢噚日暢談心得時，聽落真係「有血有淚」。佢話第一宗成交因有同行爭奪，最後搞到冇佣收；雖然買家有介紹客人畀佢，做成咗只係收到四成佣，好過冇。跟住個客又介紹朋友畀佢，睇樓時買家個LV袋爛咗，又主動賠番畀佢。最後呢班手袋黨再介紹兩名租客畀佢。梁善球回首呢啲經歷，覺得好「屈辱」。事後董事總經理黃偉雄就勉勵佢話，呢啲可鍛煉佢嘅「量度」，係邁向成功其中一步。
佢上司助理區經林少禮話，梁善球搵錢心態好強，又勤力，有時假都唔放。梁善球促成嘅交易，一手買賣佔六成，主要係東涌東堤、海堤同藍天海岸一手單位；舊年十二月重做到四五單一手，營業額有成二十萬。

舖位買家定金一擲百二萬
市況好轉，不時傳出業主賠定再賣嘅消息，買家唔想遇到呢啲情況，梗係要諗辦法保障自己啦！啱啱以一千二百萬賣出嘅長沙灣柏裕工業中心地舖，買家豪氣落定一百二十萬，難怪簽約前再有買家出價一千二百五十萬洽購，業主仍堅守承諾，賣畀佢。
據梁志輝話一般情況下，買家第一次落定都只係幾萬蚊，但呢名買家就畀一成，擺明志在必得。
個地舖四千三百呎，連一個貨櫃車位、兩個貨車位。