滙豐亞洲私人銀行前「一姐」王以智（Monica），2010年底榮休後，偶然都會出現慈善ball或藝術晚會，展露一下舞姿。中大和聲書院前晚喺會展中心舉辦籌款晚宴「九五之尊」，依人就擔任嘉賓，同拉丁舞老師Lenny Gouwerok拍檔表演「冰雪與火燄」。
Monica出名追求完美，一般拉丁舞已經難佢唔到，今次表演佢仲吊埋威吔，現場嘉賓欣賞後，都無不大讚Monica風采依然。系出名門嘅Monica，父親為已故「船王」王國桐，母親江文琤曾任編劇及導演，姨媽就係聲樂家江樺。
好多人都知佢熱愛拉丁舞，2006年Monica打入稟狀告導師拉丁舞王Mirko Saccani兩公婆，索償已繳學費及利息。庭上爆出Monica以1.2億元天價學拉丁舞，金額之巨令全城譁然。法院最後裁定佢勝訴，追返逾6,000萬元已預繳學費及460萬元利息。官司亦無阻Monica跳舞嘅興趣。