成龍、汪明荃、曾志偉、古天樂及王祖藍等，出席香港演藝人內地發展協進會啟動禮，活動後接受訪問，身為會長嘅成龍率先講：「o依家中國嘅電影同電視非常逢勃，希望中國可以開放更多嘅配額俾香港嘅藝人，無論係台前幕後燈光都係一樣，正如志偉咁講，16000部電視劇，800幾部，仲未計網劇，真係太多機會，所以呢個係我哋成立嘅目標。」

本來成龍仲想繼續講，點知志偉即打斷並話：「唔係，其實限額唔係最重要，呢個遲早都會開放，最重要係喺國內拍戲，遇到好多問題，可以去邊度申訴，喺香港大家都知可以去演藝人協會，但係喺國內係冇一個香港演藝人協會辦事處，呢個有少少似國內辦事處，不過係叫內地發展促進會，希望可以幫助香港藝人北上發展。」

志偉仲話啲藝人北上有好多新政策出咗，但佢哋唔知，咁協會就可以解釋發生乜嘢事，可以俾多啲訊息，佢又話：「我哋老嗰批有成就已經入咗去，但係後生嗰批想做嘢又可以點算？我哋希望可以帶到呢批人入去做嘢，想做電視或者電影，咪介紹職業俾佢哋。」佢續言年輕人如果想入去讀書，內協會已成立一個基金，推薦佢哋入去，如果有啲國內嘅官員想嚟香港交流，協會亦會負責接待，大家互相交流。