落成多時嘅鄉議局新大樓噚日正式揭幕，國務委員劉延東發賀電，中央都算畀足面，港府則由煲呔帶隊，唐唐、鬍鬚曾等多名高官出席，逢請必到嘅梁振英梗係在場啦。
至於八方最期待嘅貴賓，因僭建問題被村民針對嘅林鄭，卻冇蹤影。鄉議局主席發叔澄清，話林鄭噚日要開立法會又被迫缺席，絕對唔係小器。另一仕途看漲嘅局長鄭汝樺都冇到，不過好識做，早前已與下屬宴請發叔、張學明同林偉強，恭賀三人冧莊。近日出晒位嘅元朗十八鄉鄉委員主席梁福元，噚日同兄弟向發叔送上「造福新界，永留青史」牌匾，感謝發叔繼續領導原居民抗爭。