由36歲女星孫藝珍孖29歲男星丁海寅合作嘅JTBC新劇《經常請吃飯的漂亮姐姐》，將於聽日首播，兩位主演及導演噚日現身製作發佈會谷劇，而導演更於會上透露，原來劇名靈感源自宋慧喬。

導演安畔錫表示：「有啲劇名好有意義，但唔知道係講咩，又有一啲劇名意義太淺，好容易被遺忘，所以我做電視劇時，劇名就想起得具體一啲。」透露一位知名演員，曾稱自己為「經常請吃飯嘅姐姐」，令佢印象深刻，因而有呢個劇名。

而安畔錫口中呢位「知名演員」，其實就係韓劇《太陽的後裔》女星宋慧喬。喬妹去年接受韓國雜誌訪問時，表示：「我好似冇男性朋友，就係最近跟同公司嘅亞仁，以及一齊拍攝《太陽》嘅仲基走得比較近。不過對於佢哋嚟講，我只係經常請食飯嘅姐姐吧。」
（相關新聞： https://bit.ly/2E5qgRN）

所以，正係因為喬妹呢段話，而誕生《經常請吃飯的漂亮姐姐》呢個好長嘅劇名。而現實中，喬妹跟宋仲基呢段姊弟戀最終開花結果，唔知劇中嘅孫藝珍及丁海寅，又會有咩發展呢？

更多韓流，喺晒《娛果》
http://fb.com/appledailyent