今年1月先至由彭美拉斯加盟曼城嘅巴西新星「耶穌仔」加比爾捷西斯，平均89分鐘已經射入一球，效率勁過隊友阿古路，更加係英超史上目前入球效率最高嘅球員。

20歲嘅加比爾捷西斯今季各項賽事為曼城上陣6場射入咗5球，其中4球喺英超聯賽射入，佢加盟曼城以來總共喺英超射入咗11球，平均88.82分鐘就射入一球，即係話畀一場入一球仲要好些少。只係計算至少射入10個英超入球嘅球員當中，呢個數據係最犀利嘅，射入咗127個英超入球嘅阿根廷球星阿古路都只係以平均108.44分鐘排第2位，今季由曼城轉咗會去李斯特城嘅伊恩拿祖有12個入球，平均113.92分鐘入一球就排喺第3位。

至於入咗80球嘅熱刺球星哈利卡尼，平均119.53分鐘入一球，就排喺阿仙奴名宿亨利之前位列第4。亨利喺英超總共入咗175球，平均121.79分鐘射入一球。