橋實在唔怕舊，最緊要受。周柏豪喺葉念琛監製嘅新片《沒女神探》中，劇情講佢不自覺咁對自己嘅救命恩人王菀之（Ivana）心生愛慕，最後更決定「以身相許」，獻上充滿感激嘅一咀！呢一幕亦係佢哋兩個最難忘嘅一幕，Ivana更大爆柏豪喺拍咀戲前，好鬼緊張，最後仲要NG幾次先收貨。

其實今次柏豪係首次挑戰喜劇角色，雖然要佢做個姿整嘅乸型富二代，但佢話角色設計本身好有喜感，所以都花多咗心思喺個角色入面：「喺演繹時加咗好多得意嘅小動作，例如縮膊同蘭花手咁，講嘢時又會刻意提高聲線，希望令人物個性更加突出鮮明。」

聽講今次Ivana同柏豪嘅合作，亦演得好投入，成日爆肚，搞到工作人員cut咗機後都仲爆笑緊咁話。