黎明（Leon）、陳小春加張智霖有乜關係？就係佢哋3個會喺下個月1號於中環海濱活動空間，為一個打正旗號為港人搞嘅《開心幸運里》懷舊嘉年華演出喇！

大會今日喺社交網公佈，話15,000張門票已經全部售罄，仲提醒買咗門票嘅朋友仔，當日5點就可以入場，事關當日場內有個「香港美食墟」，會售賣好多懷舊小食。

Leon稍後會返香港為演出綵排，佢話嗰日時間許可，都想逛逛場內嘅美食攤檔。問佢平日鍾意食乜嘢懷舊食物？Leon話：「之前食過一個芝麻卷好好味，唔知嗰日有冇呢！」

另外，7.1當晚維港會放煙花，Leon話真係好少現場睇煙花，今次趁演出可以喺現場，同大家企喺同一天空下睇煙花，感受一下氣氛喇！

Leon目前身在內地拍電視劇《莫語者》，早前佢喺facebook上載喺內地開工時拍嘅自駕片，仲影埋佢唔小心行錯線，相當搞笑。