黑色暴雨關係,港股只得半日市,時間短咗,炒起上來都爽快好多。早段高開,接着倒插,尾市抽上,全部在三個鐘完成,散戶炒得高興之餘,轉身又快。
大家睇一睇成交,半日可以有524億元,勁乎?個市行得快,短炒就轉得快,交易時段越長,炒家根本大部份時間被大戶消磨,造成炒家離場,成交萎縮。所以,筆者一直所講,延長交易時間會令成交萎縮,絕非無的放矢,一些不是行內人、唔識嘢的人,不要再扮代表啦!
回說大市,正如筆者一直所講,指數仍是大漲小回格局,大家可安穩地持有指數大股。
但個別二、三線股已有散水迹象,特別是一些無基本因素、估值高、只炒概念的神仙股,早前十多天升得確實漂亮,但到了回吐之時,就「斷崖」下跌。
總之一句講晒,未來一段時間,就算指數破頂上升,將會有很多早前熱炒的股份持續下跌,大家要小心,勿被套牢。