【新增動新聞】
咩叫真漢子？周五德甲前列大戰，今季主場氣勢強勁嘅哈化柏林雖然憑守將比卡歷射入轉戰德甲8季以來首個聯賽入球領先1:0，但賀芬咸憑克羅地亞射手卡拉馬歷梅開二度，以及來季轉投拜仁慕尼黑嘅中堅歷卡斯蘇尼建功反勝3:1，賽後26戰得48分暫時彈上第3。

不過，上述幾位入球功臣都唔係嗰位真漢子，而係賀芬咸前鋒辛度華拿，因為呢位29歲前鋒喺14分鐘一次同伊比斯域爭波倒地，從鏡頭見到華拿隻左手食指明顯變形扭曲，神情相當痛苦，但佢並唔甘心退下火線，結果勞煩軍醫幫手「啪」番正，竟然能夠頂足全場，絕對係徹頭徹尾嘅真漢子！