分開7年嘅組合at17終於重組開騷，將於12月23及24日假伊館舉行「Girls Girls Girls at17 live in concert 2017」，日前盧凱彤（Ellen）同林二汶以維多利亞女皇look拍演唱會海報，Ellen話：「呢個造型吸金又吸睛，雖然有啲復古味道，希望大家感受到at17仍然青春！」二汶更搞笑表示：「我哋幾十歲先嚟重組，演唱會名叫GIRLS GIRLS GIRLS，女仔嚟要畀正價，男士就收半價。」

拍海報當日，兩位女主角竟然被一隻客串嘅白貓搶鏡，二汶笑住讚：「隻喵喵非常專業，識得望鏡頭，埋位就交足晒戲，不過攝影師影咗好多張，因為我哋未畀到戲，輸咗畀隻白貓仔，其實之前我哋喺度化妝，隻喵仔已經等得唔耐煩去瞓覺，可能嫌我哋手腳慢。」

溫馨提示：唔好對住貓貓落閃光燈呀！