美聯物業噚日贊助沙田馬場賽馬,名為美聯盃賽日,為咗隆重其事,包咗個包廂,招呼一眾VIP,有買家、投資者與發展商,蘭西興緻勃勃去凑熱鬧。
現場所見,好多發展商畀面出席,部份重參與遊戲與頒獎。唔少難得一見嘅舖位投資者,好似小巴大王馬亞木,與舖王「波叔」鄧成波等,都有現身。其中第四場美聯舖王讓賽,美記搵咗「波叔」做頒獎嘉賓㖭,可見佢老人家喺舖行內地位有幾高。其他住宅及寫字樓投資者,較為人熟識有黎汝遠與陳清白等。
期間,美聯集團主席黃建業捐咗十八萬八畀健康快車,搞活動之餘,不忘行善。
蘭西又發現,有啲發展商都好鍾意跑馬,手執馬經猛咁刨,跟住又落注試吓運氣與眼光,結果有贏有輸。
喺第七場美聯樓神盃開跑前,蘭西側問記者問樓神新地雷霆有乜心水,雷霆話睇好一同四號。
結果一號由頭帶到尾,四號後來居上得第二。可惜蘭西唔賭馬,走寶!
道風山起大碼樓
政府上個月底恢復賣地,其中沙田銅鑼灣山路一幅地皮,由嘉華國際以高於市場預期嘅八億六千五百萬投到。嘉華後嚟表示,會起大單位同埋小量別墅。
幅地皮喺正新地嘅道風山曉翠山莊隔籬。
噚日蘭西見到新地代理執行董事雷霆,問起新地,啱啱補咗地價嘅道風山地皮,會諗住點搞,佢話都係起大單位與別墅。
新地喺道風山可以發展嘅地皮有三幅,一大兩小,可建總樓面七十萬至八十萬呎,會先發展大嗰幅,𠵱家搞緊圖則。不過,就算賣樓都會遲過嘉華。