內地電競發展勁，2022年亞運仲列為正式比賽項目，最紅的英雄聯盟職業聯賽（LPL），已經搞到有聲有色，商機亦無限，贊助商係Intel，HP及L'Oreal，絕對唔失禮，當中最吸引到青冰眼球的，就是其中一隊參賽隊BLG，國內網友經常為此改花名，其中一個就是板藍根，最搞笑就係剛開季的夏季聯賽，大家赫然發現白雲山板藍根真的成為了贊助商，係呀香港上市嗰隻白雲山（874）。

白雲山主要業務係製藥及知名的消閒飲品王老吉，即係話現時最當炒的藥及消費板塊，去年股價表現平平無奇，今年已經累升82%，主要推動因素，就係王老吉好賣，17年這個分部的盈利貢獻增長50%，遠比製藥好，而4月公佈的首季業績，集團收入同比增30%，而盈利更勁增86%，公司解釋盈利急增有六成係來自王老吉，似乎集團將呢個老品牌年青化，初見成效。以前你覺得王老吉、白雲山、板藍根呢啲名字好老土，依家佢冒著被年青網友恥笑的風險，入侵LPL做贊助，在於一間國企黎講，算係肯放下身段，走進人群。

還記得早幾年紅罐商標之爭，代表國企的白雲山爭贏咗港資背景的加多寶，當日很多人都看好後者的發展，因為之前廿年的王老吉商標都係由加多寶負責生產及營運，至11年廣藥(白雲山的前身)興起訴訟，拿回商標權自己做。加多寶隨後生產自己的紅罐，同白雲山鬥燒錢宣傳，更贊助早年最紅的節目「中國好聲音」，但經過這幾年減價戰，財力稍遜的加多寶節節敗退，15年加多寶認衰並將包裝轉做金罐，去年仲要搵另一國企中糧包裝(0906)入股增資20億人仔，財困味濃。

讀經濟都學過，將主要對手逼走後，市佔率上升，就係加價的時候，好似早前國內啤酒話加價，雖然加幅唔算大，但都足以成為催化劑，白雲山首季已賺8.7億人仔，相比去年上半年的11億，已經非常接近，所以有理由相信，半年結後就會出盈喜，如果未來幾星期有回調，不妨趁低吸納等盈喜吧。

青冰

Fb個人專頁 http://www.fb.com/chingbing888